سون گونلرده «فارس کؤرفزی یوخسا عرب کؤرفزی» دئیه آغیر تبلیغات قیزدیرماسینا شاهیدیک. اؤزللیک ایله ایران طرفینین حساسیّتی داها چوخ دوُیولور. بو دویغوسال داورانیشلار منه «کافکا»نین «چین دوواری» رومانین خاطیرلاتماقدادیر. ندن؟! آخی ائله او روماندا دا چین امپراتورو قارا میلتی موهوم بیر خطر ایله مشغول ائله ییب واقعیت لردن اوُزاق توتماق ایسته ییر. اَن آزی کافکا بئله دوشونور. چین دووارینین فلسفه سی کافکا دئین کیمی اولماسا دا، «عرب کؤرفزی تهدیدی» کسکین بئله بیر سیاسته ابزار اولموشدور. ایران خالقی چوخ بؤیوک پرابلئم لر ایله قارشی-قارشیا دورارکن بو چتینلیک لری بوراخیب و موهومی بیر موضوع اولان «عرب خلیج»ینین آردین بوراخماییرلار. اورمو گؤلو قورویوب بؤلگه نی چؤللوک بوراخماقدادیر. مملکتین میلیاردلارجا ثروتی یییه سیز اولاراق سوورولماقدادیر. خالقیمیزین امنیت و ریفاهی زده له نیب و محو اولماقدادیر. بو واقعیتلری اونودان وطنداشلاریمیز بیرجه آددان دولایی اینترنتده ایکی یوز اَللی میلیونا یاخین «خلیج عرب» مدخلی دوزلتمیشلر! وطنلری ایشغال تهدیدی یاشایان وطنداشلار، هله «مین بیر گئجه» ناغیللاری ایله ماراقلانیرلار!

1-    خلیج کلمه سی

خلیج قورولوغا کئچمیش دنیز اوُزانتی سی دیر. بو کلمه عربجه سؤزجوک دور. تورکجه کؤرفز، اینگیلیزجه «gulf»، لاتینجه و روسجا «zaliv» دئییلن بوجغرافی تئرمینه فارسجادا معادل یوخدور. البته تزه لیکده بعضی سؤزجوکلر یاراتمیشلار. کنداب، شاخآب و... کیمی بیج سؤزجوکلر. آنجاق اؤزلری بئله بو سؤزجوکلری قوللانماغا اوُتانیرلار. آنجاق بو فاکت کؤرفزین عربلره عایید اولدوغو دئمک دئییل. یاخین تاریخ سندلرینده بو عرب کؤرفزی آدی ایله یاناشی فارس(ایران)کؤرفزی ده آدلانیب. سندلرده «سینوس عربیکوس» ایله یاناشی «پرسیسکا زالیو» و «سینوس پرسیکوس» کیمی تئرمینلرده ایشلنیب. البته بونلار یاخین تاریخه عایید سندلردیر. اَسکی تاریخده بو کؤرفزین باشقا آدی اولوپ. «کنگر کؤرفزی».

2-  دنیز حقوق مسئله سی

بین الخالق دنیزلرین حقوق پرئنسیپلرینه گؤره هر دؤلت اؤز دنیز سئکتئورلارین ایسته دیگی کیمی آدلاندیرابیلر. دنیزین اورتالاری ایسه بین الخالق سولار حئسابینا بوتون دؤولتلرین ضررسیز اولاراق «گئت-گل»ینه بوراخیلیر. بو ضرر میلی سووئرنلیک یا چئوره چئخارلارینا قارشی ایشلملردن عیبارتدیر. آمئریکا بو قانونلارا و بؤلگه ده کی متّحیدلرینین گوجونه اساسلاناراق بو کؤرفزده اساس سیاسی رول موقعیتینده دیر. باشقا سؤز ایله بو کؤرفزده ایران و عربلرین حاکیمیتی بعضی ندن لره گؤره چوخ ضعیف دیر و اساس حاکیمیت صاحیبی اولان آمئریکادیر. ایشته بو کؤرفزی حاکیمیت اساسیندا آدلاندیرماق ایسته سک «آمئریکن گولف» آدی، واقعیت لره داها اویغون اولار.

3-  چؤزوم یولو

کئچمیش ده بؤلگه خالقلاری دنیز یولو ایله بؤلگه یه گلن ایستعمارچیلارین قارشی سیندا وار گوجلری ایله دایانمیشلار. صفوی شاه عابباس کاماراو/گامبرون(کنگر) لیمانیندا پورتاغاللیلار ایله ساواشیب و اونلارین ایستعمار آیاقلارین بوردان کسمیشدیر. نادیر شاه ایسه ایرانین حاکیمیّتین گؤجلندیرمک اوچون دنیز قوه لرین تقویت ائله ییب و کؤرفز ده کی حاکیم لری اؤزی تعیین ائلردی. بو حاکمیت زندیه زامانی عربلره بوراخیلدی و پهلوی دؤنمی بحرین اؤلکه سینین عربلره بوراخیلماسی ایله برابر بعضی ایستراتئژیک آدالار و اؤنجه کی حاکمیت ایتدی.

آنجاق بوگون ایکی طرف چاغیمیزین یئنی قوشوللارین گؤز اؤنونه توتاراق ایختلافلارا باعیث اولان تاریخی ایدعالارین بوراخیب و کؤرفزین اسکی آدین ایشلتمه لی دیرلر. یعنی «کنگر کؤرفزی»(خلیج کنگر، الخلیج الکنکر). بئله لیک ایله آمئریکا کیمی غرب گؤجلرینین ده اَلیندن بیر ایختلاف بهانه سن آلمیش اولوروق!

بو آد بوگون ده بؤلگه نین بیرچوخ توپونیم لرینده قالمیشدیر. بو توپونیملرین اَن اؤنملی سی «بندر عابباس» آدی ایله تانیدیغیمیز کنگر لیمانی دیر. پورتاغاللیلار بو لیمانا گلنده شهره کنگر دئییلیرمیش. اونلار کنگر کلمه سین پورتاغال دیلینده یئنگج آنلامینا گلن «کامبارائو/کاماراو» سؤزونه اوخشادیب، رسمی مکتوبلاریندا لیمانی بو سؤز ایله آدلاندیریبلار.